有這種事!?

23年再演repo@tracylam - 大狀王2023再演 2023.12.15 個人簡單repo 有劇透

先講新CAST，19號晚場堂座M-P行右方，睇得到整個舞台努力少少睇到大概表情的距離，建議3-5倍望遠鏡

新CAST公佈時我激動咗，HI世茂！！！
呢幾日先記得望過吓D review，聽講招募演員時有400人，突圍而出的幾位新角都好勁！

但因為我都只係係個假文青仲要臉盲，我對其他新人係無咩印象的

（手指公包膠布打字好痛苦）
多得花樣獠牙令我知道魚旦，所以都幾期待佢做阿細，至少可以確定唱歌一定好聽先

ok總之19號晚新cast，事隔一年幾再返去申冤
今次終於睇到全景，但買咗望遠鏡的我放唔低個望遠鏡（。

張千今年成功考取功名上了廟堂審案坐得了茶樓說書，仲喺地府撈得風生水起管埋天下蒼生

刑灝唱腔比較多表現技巧，滑音好厲害，但演繹三個官的分別未大到可以立即分開做三個咁，呢個等下場再留意下

陳書昕演的秀秀把聲好好聽，好穩穿透力好強，雖然有見到過D CM話佢唱好過演，我係覺得佢同方唐鏡的交流未去到原Cast嗰種自然流露嘅但人地有咁大段經驗在前，我覺得以上到呢個台嚟講已經好好了

梁仲恆的方唐鏡好高，真係好高（。
劉守正的方唐鏡係古古惑惑嗰種反派樣，梁仲恆嘅方唐鏡就係斯文敗類（。
表面仲係有D（有D啦，但唔多）禮貌但其實我根本睇你唔起你肯定玩唔過我嗰種態度係舉手投足之間滲出嚟的
但一遇到阿細就變成小學鏡，笑死
佢同魚旦細個互動係小學雞（最多初中）互動嚟勁好笑

嗰種招積得戚樣成個小學雞咁真係好好笑，想像吓係確診無定向喪心病狂間歇性全身機能失調症個星爺得戚樣，就係嗰種感覺

當正鏡演繹出「我就係一個仆街, 你咬我食呀嘻嘻~」個感覺時, 炳鏡個演繹係好直接的「我係咁講架啦, 吹咩~」, 係嗰種官場老油條式同二世祖式的差別
特別係唔接福全單case時表現晒出嚟, 正鏡嗰種係有社會地位aka多年蟬聯廣東第一狀王的底氣俾佢講唔接, 但炳鏡俾我個感覺係初出茅廬二世祖被誇做廣東第一狀王就飄覺得自己有bargaining power了可以唔接

輪到講魚旦細, 之前睇花樣獠牙覺得佢好match世茂呢個角色 (即係嗰種初中男生第一次想識女仔仲要係班花個鵪鶉樣), 唱歌又好穩, 但佢一做阿細呢, 得罪講句, 係小熊貓, 我見到小熊貓

阿佐做嘅阿細同阿正做嘅方大狀係有個氣場喺度 (仲要相輔相成), 但真係得罪都要再講句, 奈何身高是硬傷, 所以當佐細企喺度就拋得住正鏡時, 魚旦細嗰種小熊貓式嚇窒法對上好高好高的炳鏡真係因為大家都同level (aka小學雞) 先會被拋到 所以我好想睇正鏡vs旦細場混cast啊!!!

至於三人互動, 拎「莫對我心軟」連同前後一幕嚟睇, 係仲有少少生硬同唔自然嘅, 但呢點無論係cast A定cast B都係咁, 應該係因為舞台戲劇手法? 因為要表現出秀秀睇唔到阿細但又要將佢兩個嘅反應併埋一齊俾觀眾睇, 始終就會有D刻意, 希望呢個以後公演可以改得再自然一D。
補充返，正鏡手指刮秀秀臉呢下親暱動作好自然嘅但我總會睇成老豆與女

唱歌嚟講, 成套劇D歌有D位其實好蝦人唱 (比如終審上高音嗰段), 不過可以突圍而出被選中都有足夠功力, 梁仲恆同魚旦把聲都好穩, 但loop咗十萬次ost的我覺得cast A 的男聲們個底比較渾厚有力, cast B 男聲們都比較平實但通透, 所以cast B幾時出ost?

other than主角們，其他演員都好勁，尤其是福臨門要特登走音個位真係好勁，以前唱choir我好容易就俾人帶走個音了

睇呢D差別真係好開心的有無人明再開心D係可以食cast A細鏡然後食埋cast B鏡細
但有一說一, 如果我第一次睇係睇Cast B先的話, 我應該無沉到咁厲害。

講返原cast, 喺方狀師出場之前我就係一個馬富定點camera, 我要睇返馬公子點show佢對臂無飛燕!!! 馬公子嗰種二世祖的得戚樣感覺好熟悉好親切 (?)

今年正鏡叫人收聲叫得細力咗, 惹秀秀打小人個樣得戚咗, 同佐細個合拍度又高咗, 成套睇落嚟個滿足感爆晒棚

劇情嚟講, 好多人都話爭D, 但我覺得以兩個半鐘的舞台劇嚟講劇情順暢有起伏有高潮, 無悶場得嚟牽引到觀眾投入落去唔出戲已經係好成功。(之前睇「你好，打劫！」我睇到只可以去留意魯文傑演技instead of 劇情而呢套明明係話劇)

大狀王主線講善惡以及何謂善惡, 我覺得佢最成功嘅係, 如果唔想思考就咁成套睇落嚟會好似飲完杯可樂咁痛快嘅 (雖然最終好人無好報), 同時如果想要有深度思考又有可以反思的台詞意境, 而假文青追劇女子如我可以同時enjoy到演員互動同埋思考劇情, 多謝官方賜糧。

有D位因為順應民(?)意改咗我都覺得好odd, 就算我知想要帶出人人都可以挺身而出做正義朋友呢點嚟回應返「宋世傑」呢個名嘅象徵意義, 但老老豆豆啦, 「我願意成為宋世傑」呢句真係成套戲最唔自然個位。

個人感受就無謂多講啦, 講返案情先

官方有話過想build up「大狀王」呢個IP, 我唔知佢個定位係想打造成百老匯式定係老少咸宜式。百老匯式就玩文化界指標(之一)啦, 我估佢地都想係發展到好似Phantom of the Opera咁長做長有變做固定節目。但呢個對於資訊爆炸速食文化盛行的時代嚟講就好有限制了。

同埋如果係長期劇目式即係玩cast啦, 香港個圈其實唔算大? 雖然我本身係因為劇本描述先買23年再演票, 但總括嚟講我個沉船原因呢, 原cast係佔好大一部分的。雖然今次cast B都好好睇, 但聽講上海定北京場因為management失當而發生咗D唔愉快的事情啦吓...

其實想做IP就比D野心, at least而家戲劇界其實都已經知道晒大狀王個成功了, 咁其實係咪應該再擴展出去吸引未接觸過的潛在市場呢? 好想佢地參考一下全世界最識經營IP的日本, 你做得劇就可以帶起埋周邊發展同經濟就如我為咗套劇連合作內陸機package都買過。

舉個例, 展覽唔係淨係放劇照放foam board, 放下服裝放下道具放埋舞台設計微縮模型都已經可以引起話題, 同時搞埋合作餐廳整個壽宴呀整隻糯米雞咁 (老老豆豆劇場茶坊D肉丸好硬好細粒我唔滿足但佢個idea我好buy的, 仲要有貼紙), 商品設計其實上海場個圓唐鏡好成功, 增加收入之餘又帶得起個話題 (所以點解香港無!!!), 劇照透卡都好靚呢個可以keep住, 綠膠要限量我明, 但其實ost都好有市場的!!

最最重要係, 我想睇錄影/重播。

官方為留記錄就一定有錄影的, 咁不如又考慮下發展成直播/戲院上映嘅可能性? 大名鼎鼎的NT LIVE個模式其實對推廣IP起到個作用真係非常之大。對未接觸過戲劇嘅人可以用個佢地familiar的方式嚟入門, 再發展到去買飛睇現場, 進一步擴大知名度先支撐到IP長存架嘛。

你淨係識向外推廣但又唔俾資源落去咁同chiikawa days 賣晒飛仲出reels有咩分別？
垃圾management點樣毀滅成個業界仲睇得少咩？

我覺得我會唔記得所以打出嚟先

今日完場成為被選中的細路去答問卷，估計應該係西九嗰邊的問卷嚟。

其中有問到有咩套票形式會吸引到我，選項包括戲飛+住宿/車/餐飲，首先你加場加票先好無。

因為現場答所以無時間寫論文但我提交咗希望透卡可以多D角色，我覺得每個角色都值得有一張自己的透卡。
同埋申訴咗點解香港場無圓唐鏡！！！

講真我真係唔想因為唔同套票而影響到我買唔L到飛。
已經夠難買了你仲要玩套票，係咪未俾人問候過祖宗十八代先？

如果係玩買到飛之後可以用優惠假訂合作住宿/餐廳我覺得可以，但你因為要搞套票又再分薄已經因為要留贊助而薄咗的pool，我真係會直接寫信去文體旅遊局。

吸引外地人到香港睇之前麻煩先確保本地人可以入場睇多謝。
香港永遠做唔好呢點，無論係邊方便都好，香港人成日都做自己地方的第三公民，憑什麼。
你唔納我稅我唔出聲呀，收咗，就算一毫子都好，你都要向我交代。

趁仲記得補埋
正鏡同炳鏡個演譯都好大分別吓
正鏡喺報應回想嗰幕望住小時候係會不自覺地流露出笑容的，你望住佢係會feel到佢發自內心去懷緬，但炳鏡個表情似係我記返起我之後會做D衰嘢，呢段前塵往事好沉重

雪地寒山嗰幕，秀秀摸阿細而阿細捉緊秀秀隻手時，正鏡係會做埋同阿細一樣的動作！觀眾睇呢幕就會諗到底係真係摸到阿細定係上咗身其實都仲係方唐鏡呢！！
而炳鏡個演繹係「我終於可以還多一樣俾你」嘅感覺嚟，唔同食法，各有各好食

同埋申冤方狀師出場時個收聲，兩個演員都有唔同口吻語氣，然後去到終審福唐鏡出場時佢有跟返的！！！omgf細節！