話說今日搭巴士出長沙灣,係落車站前一個街口見到出面一個細路流鼻血流到巴巴聲,佢身邊兩位上年紀嘅女士又荒失失咁。咁岩我坐架巴士又停緊燈位,於時我行埋去司機旁邊表露身份曬證,可唔可以麻煩佢開一開門啦(當時架巴士處於三條行車線嘅中線,位師傅望一望,就立即開門比我鳥,我覺得佢呢個行為係值得表揚的。因為佢有權唔開比我,等我係下一個街口跑返轉頭。

師傅一開門,我就左手渣住部xb360(我要拎比我呀媽玩),右邊搏頭揹住袋搵食架餐埋去幫手啦。我行埋去兩位老人家身邊表露身份時,我覺得呢兩位老人家非常有公民意識,佢地就算唔識點樣處理流鼻血,但佢地以為我個身份等同幫佢地叫救護車,所以開頭叫我唔洗幫忙(但佢又唔識點處理,但又唔叫救護車,我覺得好事黎嘅),我同佢地講句「我唔會叫救護車,好小事姐,交比我一陣得架喇」,兩位老人家就安心交比我接手鳥。

流鼻血嘅急救程序我就唔多講啦,但最爆嘅係,當我同位小朋友講「有冇血流左入喉嚨呀?有就咳出黎啦,唔好吞落去喎」之時,忽然之間唔知係小朋友親戚定家人,居然係呢個如石屎森林嘅深水步與長沙灣交界,拎出一執充滿共產主義嘅鮮綠小野草(肯定係岩岩猛嘅,因為仲好嫩綠),叫位小朋友放入鼻入面!當時我真係成個人硬晒....