有睇我其他社交網絡嘅應該都知我媽受傷入院
我人身在日本依家由飛唔返香港
尋晚深夜等我媽手術嘅果段時間
係我暫時人生中感覺最長嘅黑夜
一直喺度諗自己有咩可以做到，就算唔係實際嘅事都好，都想做啲野令到不安感變淡

而喺果一刻我突然記起我每朝都會聽嘅香港嘅電台節目
其實我開始聽嘅原因係因為掛住廣東話，同埋每朝都想有少少娛樂又唔阻妝身時間嘅
呢個節目嘅主持人有時候會分享一啲聽眾遇到嘅困難，並鼓勵聽眾
之前我一直諗:車，得個講字又無野實際幫到有乜用

但尋日嘅我打倒左以前嘅我

喺我尋晚最無助嘅時候我選擇左去呢個節目嘅ig，
send dm俾個主持人
但我又記得個主持人成日話好容易miss dm，所以我其實算係當樹洞咁發泄下
萬萬都估唔到，主持人係機緣巧合之下睇到我嘅dm，特登喺節目中撥出時間分享我同我家人經歷緊嘅難關，同時亦為我同我家人打氣同點歌

講真，我一聽到佢叫我個名果下
我係一秒崩潰左咁喊出嚟
一個人身在異地，好多事都身不由己，再加上本身已經十分思鄉
突然感覺自己不是一個人，就算係身在香港嘅陌生人唔知我係乜水都願意精神上幫助我
可能對主持人或其他聽眾嚟講只係當一段故事咁講同聽
但對於當事人嚟講原來係一股好強大嘅力量

我今日第一次真正體驗到大氣電波嘅魔力
應覺得好似體驗到以前世界大戰時英國皇室透過電台發表講話對民眾帶嚟嘅影響咁

我都即刻將主持人幫我點歌嘅部分錄低send俾我家人
一開始我其實好擔心我媽會覺得我好多事好無謂
因為我媽係果種唔鍾意將家內特別係自己嘅事講出嚟嘅人
(有次我媽call白車送我爸入急症室我都係幾日後先知)
不過，
我爸媽聽完之後，我爸send左句話:很喜歡這段點唱
而剛剛夜晚同我媽視像電話時，表情比我所預計嘅更精神，
當然仍有少許倦態，但唔知嘅人應該唔會覺得係前晚做完手術嘅人
而我媽視像時第一句問我:果個係咩節目嚟咖？咁好竟然讀你嘅點唱嘅？
雖然我媽比預計精神嘅原因有可能係醫生手勢好、瞓得夠、或者因為已返左屋企，但我相信如果無大氣電波嘅力量，我媽同我應該會只顧負面地談及傷勢

一句少少嘅話語、一個小小嘅鼓勵
原來係可以帶來咁多嘅力量
明白到原來自己週圍一直都充滿言靈魔法，
只係自己好難去察覺咁

最後請看看這可愛的車車

祝你媽恢復進展良好！ 以前都有聽開商台但依家轉聽podcast不過都唔知原來聽到點歌分享可以咁溫暖

太好啦

suksukloong:

chloe_daisy:多謝

endless8: 嗚嗚

祝伯母早日康復