所有動作戲都超好睇，特攝feel好夾呢個作品，打鬥場面勁好睇 (啲鏈球菌壞人特別有特攝嘅味道好鬼正)
仲有選角絕對冇得輸啦，白雪雪嘅砂糖不得了😍😍😍 我瘋狂地有戀愛嘅感覺😍😍😍 砂糖做嘅白血球男神咁鬼型得唔得架？！！😍😍😍
而本篇+Black兩位紅血球主角竟然可以用咁嘅形式有對手戲，真心驚喜！兩個都做得超好，神還原！！

講起神還原仲有Killer T同NK超有型！！！我好鍾意佢哋鬥咀好鬼有feel🥺🥺🥺 打戲又好睇點解可以咁正🥹🥹🥹
血小板小美人又勁可愛，心都溶化了🥺🥺🥺🥺🥺
巨噬又靚又溫柔又強大，華麗360度轉身好睇到癲咗🥺🥺🥺

仲有不得不提癌細胞(呢套戲癌細胞已經成為癌症名命白血病) 造型係同原著有啲唔同，但係成個氣場都成功做到原著個感覺，唔忍心但係佢又不得不死😭
原著癌細胞篇都係好重要嘅大長篇，原著冇演變為嚴重癌症，真人電影就搞到好大鑊，做到超有末日感！最後成功抗癌好鬼勵志又感人，仲順便鼓勵埋大家捐血同捐骨髓，係勁嘅👍🏻
成套戲可以放到咁多內容又咁流暢真心唔簡單，真係好好睇我覺得我可以睇好多次都唔會厭👍🏻
求下大家都快啲去睇唔好錯過

**********
以下講啲唔關套戲事嘅題外話
睇完真人電影版諗返好多過去工作細胞嘅回憶
工作細胞漫畫我應該係大概2015年左右已經開始睇，諗返都已經10年嘅事？！嗰時真係每話追住睇，睇完每一話都會返轉頭再睇好多次，自己身為文科出身都覺得好神奇點解會咁鍾意呢套作品

我仲係咁推身邊啲朋友睇，仲推埋大家落坑出cos😂 點知我就喺2015年年尾入咗院，結果要大家等我好耐先出到團so sorry🙈 記得住院嗰時有朋友叫我身體啲血小板加油，我心諗個手術傷口咁深我啲血小板有排搞😂 終於等到我行得返，2016年出咗大團，嗰時都未動畫化，都可以組到咁大團我真心覺得好威威，重點係一班親友一齊玩係開心嘅！過咗好耐終於動畫化之後仲要俾台灣人考古搵返我哋啲團照出嚟，話香港2016年就有咁大團係真愛🥺🥺🥺 如果冇大家落坑就唔會有呢次奇蹟，真心充滿好多回憶
TV動畫之後就係動畫電影版，全部都好好睇，真係好鍾意🥺
然後到咗2025年仲可以睇到咁出色嘅真人電影，我真係覺得好滾動😭
講咗咁耐，突然又想攞返漫畫出嚟又再睇過

最後祝大家身體健康，愛惜自己身體多啲，提醒自己唔好令體內變成黑心工廠，等啲細胞做嘢都開心啲🤣

頭先睇完！比想像中更加好睇！好正

SaMueL_WinG: 真係有驚喜，還原得嚟又改少少嘢

兩父女個身體構造同細胞個款差咁遠真係好好笑

SaMueL_WinG: 老豆身體係昭和風

apple_chibi: 連啲細胞個樣同風格都唔同

SaMueL_WinG: 但係冇大波姐姐白血球可惜呀